नव वर्ष २०८३ को हार्दिक मंगलमय शुभकामना!

नयाँ वर्षको अवसरमा स्वदेश तथा विदेशमा रहनु भएका सम्पूर्ण नेपाली दाजुभाइ तथा दिदीबहिनीहरूमा हार्दिक शुभकामना व्यक्त गरिएको छ।

यस वर्षले सबैमा सुख, शान्ति, समृद्धि र उत्तरोत्तर प्रगतिको प्रेरणा प्रदान गरोस् भन्ने कामना गरिएको छ।
- सचिवालय

सभामुख डोल प्रसाद अर्यालको सभापतित्वमा बसेको संघीय संसद सचिवालय सञ्चालन तथा व्यवस्थापन समितिको बैठकले पदाधिकारी र सदस्यका स्वकीय सचिवहरूको योग्यता निर्धारण गर्ने निर्णय गरेको छ। आवश्यक कानुनी व्यवस्थाका लागि कानुन मन्त्रालयलाई सिफारिस पठाइनेछ।

सभामुख डोल प्रसाद अर्यालसँग यूएनडीपीकी आवासीय प्रतिनिधि योकोसुकाले शिष्टाचार भेटवार्ता गर्नुभएकाे छ। भेटमा सभामुखले ई–पार्लियामेन्ट र पेपरलेस प्रणालीमा चासो व्यक्त गर्नुभयो। योकोसुकाले संसदीय क्षमता विकास, महिला सशक्तीकरण र डिजिटल संसद निर्माणमा सहकार्य गर्ने इच्छा जनाउनुभयो ।

सम्माननीय सभामुख डोलप्रसाद अर्यालले संसद भवन निर्माण कार्यबारे चासो व्यक्त गर्दै सरोकारवालासँग छलफल गर्नुभयो। तोकिएको समयमा निर्माण सम्पन्न गर्न निर्देशन दिँदै हाल ९४ प्रतिशत काम सकिएको जानकारी दिइयो। पटकपटक समय थपिएको यस परियोजना आगामी जेठ ९ भित्र सम्पन्न गर्ने लक्ष्य राखिएको छ।

सम्माननीय सभामुख डोलप्रसाद (डीपी) अर्यालले नवनिर्वाचित उपसभामुख माननीय रूबी कुमार ठाकुरसँग पदभार ग्रहणपश्चात पहिलो शिष्टाचार भेट गर्नुभयो। भेटमा बधाई तथा सफल कार्यकालको शुभकामना व्यक्त गर्दै आगामी कार्यसम्बन्धी विषयमा संक्षिप्त छलफल गर्नुभयो।

सम्माननीय सभामुख डोलप्रसाद (डीपी) अर्यालले पूर्व सभामुखहरू देवराज घिमिरे र अग्निप्रसाद सापकोटासँग भेटघाट गर्नुभयो। भेटमा नेपालको संसदीय अभ्यास, विगतका अनुभवहरूको आदान–प्रदान, संघीय संसदको प्रभावकारी सञ्चालन, विधायन प्रक्रियाको सुदृढीकरणका विषयमा विचारविमर्श भएको थियो।